فصل الشتا يعني المطر والرومانسية بس مش الفصل المناسب لعربيتك، بيحصلها مشاكل كتير تتعبك في حياتك زي ضعف البطارية، وتجمد السوائل زي زيت الماتور وزيت الفتيس والتبريد والفرامل وغيرها وده بيخلي العربية متدورش بسهولة.
ازاي تحمي عربيتك من مشاكل الشتا:
1- تسخين العربية: حاول تسخن عربيتك دقيقة قبل ما تطلع بيها، لأن ده بيفرق في أداء الماتور وبيحاقظ علي عمرها الإفتراضي، واستني لغاية ما مؤشر الحرارة يبدأ يتحرك وممكن تمشي.
2- جفف هيكل العربية: بعد المطر او الغسيل ضروري تجفف عربيتك (بقماشة او بمسدس هوا) لأن الميه مش سهل تنشف في الشتا، وممكن تعمل بارومة وتصدي، واهتم بأماكن العتب وأي تجاويف موجودة.
3- اهتم بنظافة عربيتك: حتي في الشتا اغسل عربيتك، لأن تحت العربية ممكن يتكون فيه طين او اتربة تتحول مع الميه لمصدر للبارومة.
4- المساحات مهمة: افحص المساحات في أول الشتا لو فيها عيب او نشفت من حرارة الصيف، لأنها بتحافظ علي الرؤية في وقت المطر، وهتحميك من الحوادث وتكثيف الميه علي الزجاج.
5- كاوتش العربية: افحص ضغط الهوا في الكاوتش وحافظ عليه عند المستوي المناسب، وغيرها لو فيها تآكل او قطع، واتأكد إن الجنط سليم ومش محتاج إستعدال.
6- لمبات الشبورة: اتأكد انها شغالة كويس وإضائتها قوية، لأنها بتزود الإضاءة وقت الشبورة والأمطار وبتقلل خطر الحوادث.
7- البطارية ومشاكلها: كل يومين اطمن علي البطارية وان تكون حالتها كويسة، ولو عربيتك مركونة لفترة حافظ علي تسخينها مرة كل كام يوم علشان متفقدش شحنها.
8- تكييف العربية: حافظ علي تكييف عربيتك بإنك تشغله علي البارد مرة كل إسبوعين لمدة 5 او 10 دقايق في الشتا، لأن التشغيل بيحافظ علي عدم جفاف خراطيم ومواسير التكييف، وكمان بيحميه من عدم ترسب الفريون.
You must be logged in to post a comment.