ازاي نعمل دايت من غير ما بشرتنا تتأثر ويظهر فيها علامات التعب والشحوب؟؟ طيب ايه السبب في ان يحصل كده؟؟ ياتري العيب في الدايت ولا في ايه؟؟ كلها اسئلة محتاجة لإجابة ضرورية علشان نلاقي النظام الغذائي المناسب واللي يفيد في التخلص من الوزن الزيادة وكمان نحمي البشرة ونزود نضارتها.
ايه اللي يخلي البشرة تبقي شاحبة ومش نضرة في الدايت؟
شحوب البشرة في الدايت بيكون بسبب النظام الغذائي الغير مناسب للحالة الصحية والغلط، وكمان إهماله النظام ده للمعادن والفيتامينات اللي بتكون مسئولة عن بناء وتجديد خلايا البشرة، وكمان بتديها نضارة وحيوية ومبتخليش لون الجلد يتأثر، وكمان من أسباب الشحوب ضعف الدهون الموجودة تحت الجلد، واللي بتساعد علي شد الجلد وبتخلي شكله كأنه مليان، ومع الضعف ده بيحصل ترهل الجلد والوش بيبان انه خاسس جداً، وإهمال شرب المية والبعد عن الخضار والفواكه في الدايت من أهم أسباب الشحوب لأن الكولاجين في الجلد بيتأثر.
ازاي اخس وفي نفس الوقت شكلي ميتأثرش؟
ممكن نعمل نظام غذائي صحي ومتكامل بس سعراته الحرارية أقل لخسارة الوزن، ولازم يكون فيه العناصر الغذائية من الدهون المفيدة، والكربوهيدرات المعقدة، والبروتين المفيد لصحة الجلد، ولازم نشرب كميات كافية من المية من 2.5 ل 3 لتر في اليوم، لدورها في تنشيط الدورة الدموية للجلد والبشرة، ولأنها بتحفز إفراز الكولاجين في البشرة والمسئول الرئيسي عن نضارة وحيوية البشرة.
الأكلات المهمة في فترة الدايت
ونختار الأكلات الغنية بالأملاح والمعادن والفيتامينات المفيدة لصحة ونضارة البشرة زي "الزنك – الحديد – فيتامينات (B – E – A – C) والموجودة في الفاكهة وخصوصاً البرتقال، البطيخ، الخوخ، المشمش، وكمان الخضار الورقي زي الجرجير والسبانخ، والتفاح والمكسرات خصوصاً البندق وعين الجمل والجزر والأسماك، والطماطم والفراولة مهمين طبعاً.
تمارين خاصة بالبشرة
اهتمامنا بعمل مساج للوجه بشكل دائري من الأسفل للأعلي بيساعد علي تنشيط الدورة الدموية فيه، وبيحفز إفراز الكولاجين وبيوزع الدهون بطريقة متساوية في البشرة.
You must be logged in to post a comment.