مراجعة فيلم " Come Play " 

" لا يوجد حرق لأحداث الفيلم " 

قصة الفيلم بكل بساطة بتتكلم عن ولد اسمه " اوليڤر " و بيعانى من مرض التوحد ، و ده بيسببلله مشكلة فى التواصل و الكلام مع باقى الناس ، و لحل المشكلة دى بيستخدم تابلت بيقدر بيه يتواصل مع الناس ، لكن لسوء القدر و رغم الى بيعانى منه بيتفاجئ برسائل غريبة من عفريت اسمه " لارى " بتجيله على الشاشة و بيطلب منه أنه يبقى صديقه ؛ و بس كده و بنشوف هيحصل ايه ........ 

الفيلم اكتر شئ بيميزه أنه فى الشكل العام ممكن تحسه زى اى فيلم رعب او طريقة تتطور الأحداث خلال الفيلم ، لكن هنا احب ابشرك انك انت هتشوف عمل مختلف و ليه رساله حلوة و عامة و ممكن توصل لناس كتير و تبقى مخيفة فعلا و ممكن ناس تانية تشوفها مبالغة شوية لكن فى الحالتين الفيلم مش هيحبطك من جانب المتعة الى هتكون مستنيها .

الفيلم من جانب الرعب كان فعال فى اوقات كتير و خصوصا مع طبيعة حالة الطفل و اصل الكيان المرعب الى المفروض أنه بيهدد الطفل و عائلته و المشاهد إلى فيها اطفال هتوصلك احساس فيلم زى  فيلم " It " . 

تسلسل نهاية الفيلم عجبنى و كان مفاجأ ليا الطريقة إلى الفيلم خلص بيها لكنها كانت مفيدة دراميا و أنهت الفيلم بشكل كويس من غير ابتذال . 

مدة الفيلم مش طويلة و دى حاجة بتبسطنى شخصيا لأنها بتخلى التجربة امتع و العيوب الى فيها أقل ، خصوصا فى حالة الفيلم ده أنه تطوير لفيلم قصير كان نزل سنة 2017 من إخراج نفس المخرج بأسم " Larry "  فمكنش المادة الخام إلى فى الفيلم محتاجة وقت زيادة و لو كانت زادت كان ممكن انها تعانى من بعض الخبطات المحلوظة . 

الفيلم زى معظم افلام الرعب عيوبه إلى ناتجه عن مشاهد الخضة و الفزع فيه منها مكرر من حيث تسلسل المشهد و حركة الكاميرا لحد اللحظة الحاسمة و متوقعين ، لكن ارجع و اقول الفيلم كان حلو مختلف فى جوانب تانية و اتمنى اى حد يشوف الريفيو يتفرج عليه و يديله فرصة . 

فيلم " Come Play " فيلم رعب مختلف و ممتع و انصح بيه . 

الفيلم من احدث انتاجات 2020 و متاح دلوقتى فى السينمات و تم إصداره اونلاين ، فكل واحد يشوف حابب يشوفه فين لكن شايف أنه المشاهدة فى البيت للفيلم و نوعيته افضل مع الأجواء المناسبة ، و خصوصا فى الظروف الى العالم بيمر بيها . 

تقييمى للفيلم ...... ( 7  / 10 ) .