ادمان السوشيال ميديا 💆‍♂️

- من فترة كنت بحسب الوقت اللي بقعده على الموبايل وانا فاتح السوشيال ميديا.. لقيت إني بقعد متوسط 9 ساعات يومياً.. منهم 5 ساعات تقريباً على السوشيال ميديا.. يعني 150 ساعة ضايعين كل شهر وأنا بقرأ رسايل مالهاش لازمة، وبتصفح في بوستات شخصية مش هتنفعني بحاجه! 

- وغير إنها كانت بتضيع وقتي.. السوشيال ميديا عموماً والفيسبوك خصوصاً كانوا بيأثروا على نفسيتي بالسلب.. كنت أفتح ألاقي جار ابن خالة فلان وقع من الدور السابع ومات بعد ما قتل مراته وعياله! طاب هل انا المفروض أعرف خبر زي دا؟ لأ طبعاً انت مش محتاج تعرف كل الوفيات والكوارث اللي في الكون وتتعاطف معاها.. كدا مشاعرك هتُستنفذ..

- خصوصاً إن الأخبار السيئة بتفضل محفورة في دماغك عكس الأخبار الحلوة.. يعني مثلاً لو واحد صاحبك اتجوز ولا حد من قرايبك نجح أو جاله عيل.. بتقوله مبروك وبتفرح في ساعتها وخلاص الخبر بيعدي.. إنما لو حد مات، انت ممكن تقفل الفيسبوك وتفضل تفكر في الشخص اللي مات دا بقيت اليوم حتى لو ماكنتش تعرفه أصلاً! فـ الموضوع ماعدش مقتصر على الخمس ساعات اللي انت فاتح فيهم فيسبوك.. لأ دا الموضوع بيفضل مأثر عليك بعدها كمان..

- أكيد بتيجي عليك أوقات بتحس إنك مخنوق ومتضايق.. ومفيش أي سبب ولا أي حاجه حصلت.. دا لأن اللاوعي عندك عمال بيتملي أفكار سلبية وأخبار وحشة طول اليوم.. فـ بتلاقي نفسك مكتئب ومش عايز تتكلم مع حد.. ولو حد سألك مالك هتقوله مفيش.. عشان هو فعلاً مفيش.. مفيش حاجه ماسكها مضايقاك.. هي كلها تراكمات سلبية في عقلك.. 

- ودي نقطة اتكلموا عليها في فيلم

 "The social dilemma"

دا فيلم وثائقي كانوا مستضيفين فيه ناس شغالين في شركات السوشيال ميديا، فيسبوك وتويتر وانستجرام، حتى جوجل ويوتيوب.. بيقولك هما ازاي بيتحكموا في مشاعرك.. ازاي بيعرضولك ترتيب البوستات على الهوم بيدچ.. ازاي بيـ Recommend الإعلانات والڤيديوهات.. ازاي بيشوف السيرش بتاعك وعلى أساسه بيعرضلك بوستات، وبعد البوستات دي يعرضلك منتج للمشكلة اللي كنت بتبحث عنها في الأول على جوجل!

بيعرفك إن حرفياً السوشيال ميديا بقت بتتحكم فينا زي العرايس الماريونت..

- عموماً دا مش موضوعنا.. دي نقطة على جنب كدا عشان تتفرجوا على الفيلم دا وتعرفوا إن في أسباب تانية تخليكم تقفلوا السوشيال ميديا غير إنها بتضيع الوقت وبتبوظ النفسية.. 

- نرجع لموضوعنا.. في الفترة من 2017 أنا كنت بقفل السوشيال بالشهور.. كنت ممكن أقعد 6 أو 7 شهور قافل كل حاجه.. والموضوع كان بيفرق معايا جداً.. كنت بلاقي وقت للمذاكرة، ووقت للعب، والخروجات، والقعدة مع أهلي، ومراجعة القرآن.. 

- وكنت ساعتها مش بتأثر خالص ومش بهتم إني أفتح أشوف طنط مديحة كتبت تعليق ايه على منشور طنط سميحة.. لكن أول ما افتحه، الموضوع بيجيب بعضه وبرجع للإدمان.. لحد ما آخد القرار تاني وأقفله.. وهكذا.. 

- بالكلام عن الإدمان.. الكلمة دي لما تتقال عن السوشيال ميديا مش بتتقال مبالغة.. السوشيال ميديا فعلاً إدمان.. قارن أي حد من صحابك أو قرايبك بمدمن المخدرات.. هتلاقيهم زي بعض بالظبط..

دا مايقدرش يقعد من غير الموبايل ودا مايقدرش يقعد من غير المخدرات.. دا لو أخدت منه الموبايل هيتعصب ويتوتر ودا لو أخدت منه المخدرات هيتعصب ويتوتر.. دا لو موبايله فصل ولا النت قطع عنه هيقعد يفرك ويحرك لحد ما يوصل له والتاني لو المخدرات خلصت من معاه هيفضل يفرك ويحرك لحد مايجيبها.. قول للأول اقفل السوشيال ميديا هيقولك انا لو عايز أقفلها في أي وقت هقفلها قول للتاني بطل مخدرات هيقولك انا لو عايز أبطل في أي وقت هبطل.. والحقيقة إن الاتنين مدمنين والاتنين مايقدروش يبطلوا..! 

- أنا شوفت عيال صغيرين لسه بادئين يتكلموا بيقعدوا بالـ 10 ساعات على التابلت والموبايل.. شوفت عيال بيعيطوا ومش بيسكتوا إلا لما أمهم تديهم الموبايل.. انتم بتضروا ولادكم كدا.. بترمولهم سم.. العيال هيطلعوا فاقدين حواسهم.. هيطلعوا متخلفين عقلياً والله.. 

- المهم يعني إن السوشيال ميديا إدمان حرفياً، واللي عاملينها مصممينها بطريقة تخليك تدمنها.. وكل أبديت بينزل لأي أبلكيشن بيبقى نازل عشان يخليك تتعلق بيه أكتر..

- فـ لما تحاول تبعد هتلاقي نفسك بتـ Detox.. هتمر بأعراض انسحاب زيك زي مدمن الهيروين.. هتلاقي أول يومين هما أصعب يومين.. بعد كدا هتلاقي الموضوع سهل.. بعد كدا هتلاقي الموضوع أحلى بكتير.. هتبدأ تستخدم حواسك.. هتلاقي تركيزك زاد، وذهنك صفي، ونفسيتك اتحسنت.. 

- ممكن في النص تحس إنك عايز تفتح خمس دقايق تشوف الدنيا فيها ايه.. قاوم نفسك وماتفتحش.. هيكون في ايه في الدنيا يعني! ولا حاجه.. الناس عماله تسف على بعض.. عادل شكل صبغ شعره.. رانيا يوسف لبست فستان جديد.. الزمالك خسر وبيحفلوا عليه.. علاء ابن خالتك نجح في امتحان الاعدادية.. وعمو سعيد بيحتفل بعيد ميلاد بنته لوچين!

- لو في مصيبة حصلت هتسمع عنها من صحابك أو في التلفزيون ماتقلقش.. لو حد من قرايبك مات هيتصلوا بيك.. لو القيامة هتقوم هتعرف.. غير كدا مفيش حاجه هتفوتك.. 

- انت على طول هتبقى قاعد وحاسس إن في حاجه فايتاك.. وصدقني لو اتخلصت من الاحساس دا.. مش هتفتح السوشيال ميديا تاني في حياتك.. 

- خليك مصحصح كدا واستغل الوقت دا.. 150 ساعة في الشهر دول انت ممكن تعمل فيهم حاجات كتير.. ممكن تقرألك فيهم كتابين تلاتة في مجالك.. ممكن تحفظ جزء قرآن.. ممكن تبدأ تذاكر في مجال جديد خالص.. ممكن تاخد كورسات وتطور نفسك.. ممكن تدرس لغة جديدة.. ممكن تنزل چيم وتعمل فورمة.. ممكن تسافر تتفسح.. ممكن تذاكر للإمتحانات اللي انت داخل عليها دي وتجيب تقدير كويس.. 150 ساعة كل شهر دول عُمر هتتسأل عنه قدام ربنا..