ممكن تصدق ان عقلك يخدعك او يبعتك زى ما بنقول الاكس ماشى ،ماما وهى بتحاول تاكلك كوسة لكن عقلى ده احنا ملناش غير بعض الحقيقة اه وبتحصل كتير .
عمرك سمعت ان واحد قلبه يوجعه فيمسك كتفه وكلنا بنقعد نهاهاها 😂😂
بس ده حقيقى واسمه ألم مرجعى او الم منقول اوReferred pain بلغتنا اووى الوجع مسمع فين 😊
وفهمنا ومعرفتنا بالموضوع هتفيدنا نفهم جسمنا اكتر ونحافظ عليه بدل ما احنا مبهدلين جسمنا معانا كده وخلاص
بمعنى انك هتحس بوجع ف مكان ف جسمك( غالبا الجلد )بس السبب الحقيقى هو وجع ف مكان تانى .
فيه نظريات كتيرة بتفسر النظرية دى اهمها
⬅ان المكانين بيغذيهم نفس الاعصاب
⬅ ان شبكة الاعصاب ف جسمنا فيها شئ من التداخل والتجمع فمثلا لو عصبين تداخلوا مع بعض هتيجى الاشارة للمخ من مكان بوجع معين و مستنيه ترجع لنفس المكان بس التداخل ده بيبعتها مكان تانى .
⬅ تفسير تالت عقلك دايما متعود ع الاشارات الحسية من الجلد لان مستقبلات الاحساس اكتر ف الجلد فتيجى الاشارة من أعضاء داخلية فالمخ يترجمها الجلد المتغذى بنفس الأعصاب.
النظريات كتيرة والموضوع كبير مش دى النقطه اللى تشغل بالنا وتفيدنا بس هى خطوة للفهم .
المفيد بقا انواعه ايه هحس بايه فاخد بالى ودى اعظم جزء فكلامى
⭕ وجع القلب بتحسه ف الكتف الشمال او منطقة الدقن وأحيانا السنان السفلى الاربعه اللى تحت
او ف الضهر او الدراع واحيانا الايد
⭕ وجع المرارة بيتحس ف الكتف اليمين
⭕وجع الزايدة بيكون عند السرة
⭕وجع البنكرياس هتحسه ف الضهر
⭕وجع الكلية هتحسه ف ↙ بطنك بالشكل ده
⭕وجع ودنك يكون ف سنانك والعكس
مع اضافة انك هتحس بوجع ف مكان وجعك برضو عشان ميختلطش الامر علينا بس معرفتنا بالظاهرة دى هتساعد جدا ف التشخيص وبالتالى العلاج
🌸 حابة اضيف ان الشعور بالالم من اهم نعم ربنا لولا الالم كنا هنفقد حيوات كتيرة جدا نقدر ننقذها لمجرد انهم مش حاسين بحاجه فالحمد لله ع نعمه الالم
وده بيحصل ف مرض CIPA وهو عدم الحساسية الخلقية للالم * اقروا عنه هتنبسطوا او شوفوا المسلسل الكورى DR John
اخيرا شوية tips ازاى نتعامل مع الالم العادى
1-لو هتاخد دوا خليك دايما ف البنادول والباراسيتامول والنيفادول لانهم اكثر المسكنات أمانا ع الكلي
2-لو قادر تستحمل شوية فممكن تحط ميه سخنه او باردة ع مكان وجعك
3- ممكن تعمل مساج هتقلل الوجع برضو
ف النهاية اتمنى لكم حياة هادية وسعيدة بصحه تامه❤❤
#stay_home
#stay_safe
You must be logged in to post a comment.