مهنة أجدادنا الفراعنة كانت الزراعة لأنهم كان بيعيشوا علي ضفاف نهر النيل، وكمان الموارد الطبيعية زي المية والتربة الخصبه كانوا متوفرين، وده خلي اكتر الأكلات اللي نعرفهم دلوقتي يظهروا من زمان ويبقوا عناصر اساسية كمان في كل بيت.
محاصيل من سنين كتير: عرفوا زمان يزرعوا الشعير والقمح الجبلي والقمح العادي واللي اتعرف في فترة متأخرة، وبكده رغيف العيش كان موجود ايام الفراعنة ولأنه مصدر رئيسي للكربوهيدرات وصل لـ 40 صنف وكان بيتحشي بالعجوه وموجود الغامق والفاتح يعني دلعوه علي الأخر، دول كمان عملوا عيش سن كان اسمه "يوكل" من دقيق الرده مفيد للصحه والدايت وغني بفيتامين ب والألياف، والعيش الشمسي اللي موجود في الصعيد لغاية انهارده.
بقوليات وخضروات من زمن فات: الفراعنة عرفوا وزرعوا الفول والعدس واللوبيا والحلبه والبسله والترمس والحمص لأنهم اكلات رئيسية عندهم، وكمان البامية والملوخية والبسلة والقلقاس والكرنب واللفت والخس والثوم والبصل والكُرات.
الفاكهة في عهدهم: كانوا بيزرعوا العنب وده استخدموه في صناعة النبيذ يعني كانوا صحاب مزاج، والتين والجميز والرمان والبطيخ والكمتري والنبق والحرنكش والدوم والبلح وكان اهم حاجة لأن كان بيتصنع منه العجوه، ده غير بقي الزيوت اللي كانوا بيستخرجوها بطرق طبيعية للطبخ والأغراض الطبية من حبوب الكتان وبندق أشجار المورنجا.
أكلات بتنقرض والباقي بننساه:
الويكة: اكلة تقليدية بتتعمل من البامية مع اللحمة والكزبرة والتوم وبتتاكل مع الرز الابيض او العيش.
الفريك: كان الفراعنة بياكلوه قبل حصاد القمح في الربيع، بعد ظهور حبوب القمح الأخضر وبيجرشوه ويطبخوه مع اللحمة او مع اللبن.
الخُبيزه: الجيل الحالي ميعرفهاش، دي ياسيدي شبه الملوخية لكن اكبر شوية وبتتطبخ مع شوربة الفراخ او اللحمة مع الشبت والكزبرة.
شوربة الفول النابت: اقتصادي ولذيذ، وبيمد جسمك بالبروتين والأملاح والمعادن، ولأن الفراعنة ادركوا فايدتها من الاول خلوها من الأكلات الاساسية في مطبخهم وتفننوا فيها.
البصاره: بتتكون من الفول والبصل والكُرات، وجبة نباتية بس نينجا مليانة عناصر غذائية وفيتامينات وبتتعمل بسرعة علشان كده الفراعنة حبوها.
المخروطة: "نودلز الغلابة" بتتكون دقيق ومية وملح وبتتقطع شرايح شبه المكرونة او النودلز بس اكبر شوية، وتستوي علي البخار وبتتاكل مع اللبن والعسل الاسود او مسلوقة.
الشلولو: اسمها عجيب لكنها من الأكلات المصرية القديمة جداً ومنتشرة في الصعيد حالياً، اساسها ملوخية جافة ورز وليمون وتوابل، سريعة في التحضير وفوائدها كبيرة.
العيش الشمسي: او الملتوت من أقدم انواع العيش اللي عرقها المصريين، لأنه من عصر الفراعنة، وبيتم العجن والتقسيم وبيسيبوه في الشمس، وقرب ينقرض من البيوت في صعيد مصر.
You must be logged in to post a comment.