كام مرة زعلتي علي شعرك اللي بيقع وكنتي بتبقي محرجة ومكسوفة لو ده حصل في كوافير او حتي مع ناس تعرفيهم، والتساقط مبيفرقش بين انسة ومدام وسببه بيكون مجهول والعلاج مش موجود، احنا هنقدملك دلوقتي السبب والعلاج في موضوعنا ده.
بداية الشعرة لغاية تساقطها: دورة نمو الشعر بتمر بمراحل اولهم مرحلة الظهور من البصيلة وبتستمر سنين وبتطول 1 سم في الشهر، وبعدها بتبدأ مرحلة الراحة او المرحلة الانتقالية واللي بتستمر من أسبوعين لـ 3 اسابيع، واخر مرحلة بتكون تساقط الشعر ودي بيقف فيها نمو الشعر ولكن بيكون مرتبط بالبصيلات لمدة 3 شهور.
الشعر بيقع ليه: أسباب كتير لتساقط الشعر هنلخصها ليكي في النقط اللي جاية:
1- وجود مشكلة في الغدة الدرقية بسبب افراز هرمونات الجسم.
2- الحمل والولادة واللي بيسبب مشاكل في الشعر زي التساقط والضعف.
3- التهابات شديدة في فروة الراس.
4- الابحاث اثبتت ان ارتفاع نسبة الكوليسترول في الدم بتسبب تساقط الشعر.
5- المواد الكيماوية زي "الصبغات، كريمات فرد الشعر، الشامبو".
6- التوتر والضغط النفسي والعصبي يعني بلاش عصبيتك الزيادة.
7- نقص فيتامينات في الجسم زي فيتامين ب، لأنه بيعزز صحة الشعر وبيمنع التساقط.
8- الاجهاد البدني والنفسي.
توقفي التساقط ازاي: عرفنا المشكلة ودلوقتي نقول الحل:
1- كتري من الاكل اللي فيه نسبة عالية من الفيتامينات والعناصر الغذائية وخصوصاً فيتامين ب يعني الخضار والفاكهة.
2- اشربي سوائل وخصوصاً المية والعصائر الطبيعية.
3- ابعدي عن التوتر والضغط النفسي والعصبي.
4- اهتمي بالرياضة لأنها بتعزز صحة الجسم والشعر والبشرة كمان.
5- استخدمي الزيوت الطبيعية بدل المواد الكيماوية واهتمي بزيت الزيتون والخروع والجرجير لأن فيهم نسبة عالية من الفيتامينات والعناصر الغذائية لفروة الراس.
6- فرشة الشعر بأسنان واسعة مش هتأثر علي بصيلات شعرك.
7- بلاش التسريح والشعر مبلول.
8- واهم من كل ده لو التساقط زاد عن الحد الطبيعي لازم تستشيري الدكتور.
You must be logged in to post a comment.