مرحبا , مش عارفة من وين أبلش , في كتير أشياء بدي أحكيها , ما بحياتي حكيتها لحدا , وما أظن حد يهتم بشكل جدي لل بلوجز اللي حكتبهم , ف مش غلط , جد مش عارفة من وين أبلش و من المكان اللي أنا فيه هسا , ولا وين كنت السنة الماضية ولا أحكي عن الأشياء اللي بخططها , ولا أحكي عن بداية معاناتي بالإكتئاب والأمراض النفسية .
راح أبلش من الأول , مش مهم إسمي بس عمري حيصير 21 بالفترة اللي جاي , وخلوني أخبركم أنا عم بصارع عقلي من حد ما وعيت ومن حد ما بتزكر بداية الدنيا , يعني بنقدر نحكي من خمس أو ست سنين , واللي خلاني أنغمس بالحزن والإكتئاب أو بنقدر نحكي الشعلة اللي خلت عقلي محاصرني ومقيدني جوا مكان واحد زي ما كلكم متوقعين قصة حب , ما بعرف ليه هيك صار ووين كانت البداية , وليش بسميها قصة حب وأنا كنت بأسوأ سنين مراهقتي , بس خلوني أحكيلكم إني لهلا بعاني من اثارها , ولهلا هي أكبر مشكلة بحياتي , ما راح أفوت بالتفاصيل هلا , لأني ما بدي أوقع بحفرة التجاهل كمان مرة بحياتي لأني تعبت , كتير تعبت , وحياتي فيها أكتر من مجرد قصة حب فاشلة , الصراحة فيها أسوأ بس ما إثر فيني من قبل , ما بعرف معقول بدي أعيش قصة حب ملحمية بخيالي شو ما كان الثمن لدرجة تجاهلت مشاكل أكبر وحطيت كل اللوم عالحب ؟ وهو عنجد كان إسمو حب ؟ لهلا عم بحمل مشاعر بقلبي لهاد الشخص , أحيانا كره أحيانا إشتياق وأحيانا إشمئزاز , وبالمناسبة لهلا هو موجود بحياتتي , وهو بعتبرو نقطة التحول بحياتي لكل إشي مريت فيه مشاعري وشخصيتي ومعارفي وأهلي , كان السبب بتغيير كل إشي بحياتي , لدرجة وصلت إني ما أعرف حالي وما أعرف مين حكون بدون وجوده بحياتي , مجرد كتابتي عن الموضوع فتحت أماكن سكرتها بعقلي من زمان وفتحت جروح كنت بفضل أنساها , بس مرة في حد حكالي خلي الإشي يضل يوجعك لحد ما يبطل يأثر عليكي , وهاد اللي حعملو إذا كملت هاي البلوجز .
You must be logged in to post a comment.